Martin Fayulu uravuga rumwe nubutegetsi bwa Kinshasa yavuze ko muri RDC habaye ihirika ubutegetsi mu mwaka wa 2018.

Yanditswe na: Bruce Bahanda, tariki 18/08/2023, saa 10:00Am, kumasaha ya Bukavu na Minembwe.

Martin Fayulu utavuga rumwe n’ubutegetsi bwa Repubulika ya Democrasi ya Congo, RDC, yatangaje ko mu mwaka wa 2018 muri iki gihugu habaye ihirikwa ry’ubutegetsi bwari bugiye kujyayo hashingiwe ku Itegekonshinga.

Ibi yabitangaje ubwo yagaragazaga ko ashyigikiye ko Mohamed Bazoum wakuwe ku butegetsi n’abasirikare tariki ya 26/07/ 2023 yabusubiraho, mu rwego rwo kubahiriza ibiteganywa n’Itegekonshinga.

Fayulu ati: “Mu gihe muri Niger twibaza ku buryo hasubiraho gahunda y’Itegekonshinga nyuma y’ihirikwa ry’ubutegetsi ryakozwe n’abasirikare, muri RDC turibaza ku buryo twakwirinda indi coup d’état y’Itegekonshinga nyuma y’iyabaye mu 2018. Kwica itegekonshinga ni intandaro y’umutekano muke muri Afrika.”

Uyu munyapoliti ni umwe mu bakandida batatu bari bahataniye umwanya wa Perezida wa RDC mu mwaka wa 2018.hari kandi na Félix Tshisekedi uyoboye iki gihugu na Emmanuel Ramazani Shadary wari uhagarariye ishyaka PPRD rya Joseph Kabila.

Komisiyo y’amatora ya RDC yatangaje ko Tshisekedi yagize amajwi 38.56%, Fayulu agira 34.82%, Shadary agira 23.83%, gusa Fayulu yatangaje ko iyo atibwa amajwi, aba ari we watsinze, akayobora iki gihugu.

Ibyo kuba Fayulu “yaribwe amajwi” si we gusa wabivuze kuko hari n’amahanga yabigaragaje mu marenga, muri uyu mwaka wa 2023 biza gushimangirwa na Corneille Nangaa wayoboraga komisiyo y’amatora icyo gihe, akaba ari na we watangaje intsinzi ya Tshisekedi.

Kwibwa amajwi kwa Fayulu ni ko yise guhirika ubutegetsi yari yahawe n’abaturage bamutoye ku bwinshi. Ni na byo asaba ko bitazasubira mu matora ateganyijwe mu mpera z’uyu mwaka wa 2023, aho byitezwe ko azaba ari umwe mu bakandida bakomeye bazaba bahatanye.