Muri Rutshuru habyukiye imirwano ikaze hagati ya M23 n’ihuriro ry’ingabo za RDC.

Imirwano ikomeye hagati y’umutwe wa M23 n’ingabo za Republika ya Demokarasi ya Congo, n’abambari bayo, izindutse ibera mu duce twinshi two muri teritware ya Rutshuru mu Ntara ya Kivu Yaruguru.

Ni ibitero ihuriro ry’ingabo z’ubutegetsi bwa Kinshasa ryagabye ahitwa Sisa, Rubona no mu nkengero zaho.

Amakuru adushikiye avuga ko urusaku rw’imbunda ziremereye n’izito kwarirwo ruri kumvikana muri ibyo bice ndetse no mu nkengero zatwo.

Minembwe Capital News yanamenye kandi ko ibi bitero byagabwe mu gace ka Rubona, haherereye mu birometero nka 4 uvuye muri centre ya Kizimba, muri grupema ya Bukombo, teritware ya Rutshuru, byatangiye igihe cisaha z’urukerera rwo kuri uyu wa Gatatu tariki ya 11/09/2024.

Ni mu gihe kandi no ku munsi w’ejo hashize, hari habaye indi mirwano, aho yabereye muri Katale, Kaniro ndetse kandi no ku wa mbere urugamba rukomeye hagati ya M23 n’ingabo za RDC n’abambari bayo rwabereye mu duce twa Muheto, Munanga, Buzihe, Kibirwa na Mumba, muri teritware ya Masisi. Umuvugizi wa M23 mu bya politiki yasobanuye ko bashotowe n’ihuriro rya leta ya Kinshasa ryarashe mu bice bituwe n’abasivili.

Nyamara kandi iyi mirwano irenga ku mwanzuro wafatiwe i Luanda muri Angola mu kwezi kwa munani, usaba impande zombi guhagarika intambara guhera tariki ya 04/08/2024 kugira ngo hashakishwe amahoro yagaruka binyuze mu nzira y’ibiganiro.

Ariko, impande zombi zagiye zishinjanya gutangiza imirwano, ndetse n’ubushotoranyi muri teritware zitandukanye zigize intara ya Kivu Yaruguru.

Gusa, umuvugizi wa Guverinoma ya Kinshasa tariki ya 09/09/2024, yabwiye igitangaza makuru cya France 24 ko nubwo habaho iyi mirwano, hakomeje guterwa intambwe nziza iganisha ku mahoro.

             MCN