Abaminisitiri babiri i Kinshasa basabiwe gutabwa muri yombi.

Abasabiwe gufungwa ni minisitiri w’ubutabera, Constant Mutamba na Jacquemain Shabani ushinzwe minisiteri y’umutekano w’imbere mu gihugu, ni nyuma yaho imfungwa 129 ziciwe muri gereza ya Makala iherereye i Kinshasa.

Imiryango ibiri iharanira uburenganzira bwa muntu muri Repubulika ya demokarasi ya Congo, niyo yatanze ubu busabe bwo guta muri yombi aba minisitiri babiri bo muri iki gihugu.

Tariki ya 02/09/2024, imfungwa zo muri gereza ya Makala zarishwe ubwo zageragezaga gutoroka. Minisitiri Shabani yasobanuye ko mu bapfuye barimo 24 barashwe n’abacunga gereza kandi ko hari abandi 59 bakomeretse.

Iyi miryango, NSCC(Nouvelle Sociéte Civile Congolaise) na RDDH-LC(Réseau des Défenseur Des droits Humains et Lutte Contre la Corruption), ibona aba baminisitiri babiri bakwiye gufungwa nk’abafite mu nshingano imfungwa n’abashinzwe umutekano barindaga gereza ya Makala.

Yasabye kandi umuyobozi wa gereza ya Makala, abashinzwe ubutasi bwa gisivile n’ubwa gisirikare ko na bo batabwa muri yombi, igaragaza ko bagize uruhare muri ubu bwicanyi.

Iyi miryango ibona ko hakwiye gukorwa iperereza ryigenga, rizafasha mu kwerekana ukuri ku bwicanyi bwakorewe muri gereza ya Makala, ababugizemo uruhare bose bakagezwa mu butabera.

Minisitiri Shabani yemeje ko iyi miryango yashimangiye ko uretse abapfuye ndetse n’abakomeretse, hari abagore basambanyijwe ku ngufu ubwo imfungwa zageragezaga gutoroka.

Umuryango ACA(Association Congolaise pour l’Accès a la justice) uharanira kugeza ubutabera kuri bose, ubona ko kugira ngo ibizava muri iri perereza byizerwa, leta ya RDC ikwiye gukorana n’ishami ry’umuryango w’Abibumbye muri iki gihugu rishinzwe uburenganzira bw’ikiremwamuntu n’indi miryango yigenga.

        MCN.