Uwarashe agakomeretsa Donald Trump wahoze ari perezida w’Amerika, yamenyekanye.
Ni ibyatangajwe n’urwego rushinzwe iperereza muri leta Zunze Ubumwe z’Amerika (FBI), ruvuga ko uwarashe Donald Trump agakomereka ari umusore w’imyaka 20, wo mu gace ka Bethel Parks ho muri leta ya Pennsylvania.
Donald Trump yarashwe ku gicamunsi cy’ejo hashize, tariki ya 13/07/2024, ubwo yari mu gikorwa cyo kwiyamamaza ku mwanya w’umukuru w’igihugu muri leta Zunze Ubumwe z’Amerika. Aha yari muri aka gace ka Butler ko muri leta ya Pennsylvania.
Nyuma y’uko yari amaze kuraswa agahita akomereka ku gutwi kw’iburyo, abashinzwe umutekano we, bahise bamuvana imbere muri sitade aharimo habera ibikorwa byo kwiyamamaza, bamujana hanze yayo, kugira ngo yitabweho, nk’uko ay’amakuru yashizwe hanze n’urwego rukora iperereza muri Amerika (FBI).
Uru rwego kandi rushinzwe iperereza, runavuga ko “abashinzwe umutekano w’abanyapolitike n’imiryango yabo (secret service), baburijemo uwo mugambi utararangira kandi baza kwica barashe Thomas Crooks w’imyaka 20 y’amavuko wari wateguye icyo gikorwa kugira ngo ahitane ubuzima bwa Donald Trump.”
Umwe mu bayobozi bakuriye iperereza mu mujyi wa Pittsburgh yatangaje ko iki gikorwa cyo gushaka guhitana ubuzima bwa Donald Trump cyatangiwe gukorwaho iperereza.
MCN